PIDARTA BASA BALI

Oleh : Ni Kadek Ayuni Susanti

Ngajegang Bali Antuk Seni Lan Budaya Bali

Suksma aturang  tityang ring pangenter acara antuk galah sane katiba ring sikian tityang, punika taler majeng ring Bapak I Nyoman Jati, sane dahat wangiang tityang lan para mahasiswa iriki sane tresna sihin tityang. Inggih sadurung tityang ngalanturang maatur-atur lugrayang tityang ngaturang angayu bagia majeng ring Ida Sang Hyang Widhi Wasa, duaning sangkaning asung kerta wara nugrahan Ida, mawinan tityang miwah Ida dane prasida mangguh karahajengan  mapupul ring genahe iriki lan  nenten je kirang punapa punapi malarapan antuk ngaturang pangastungkara “Om swastyastu”. Ring galah sane mangkin tityang jagi mapidarta sane mamurda “ Ngajegang Bali Antuk Seni Lan Budaya Bali”.

Inggih Ida dane sareng sami sane kusumayang tityang.

Sekadi sane sampun kauningin indik jagat Bali sane sampun kaloktah antuk seni lan budayannyane ngantos ke dura negara. Akeh para wisatawan domestik miwah dura negara sane rauh ke Bali matetujon ngaksi sekancan seni lan budaya sane pinih akeh lan sarat antuk nilai-nilai religius kaagamaan. Nanging sekadi jamane mangkin, seni lan kebudayaan lokal punika nyansan susut. Napi malih sepengrauh para wisatawan duranegara lan domestik sane pacang ngeninin keajegan budaya Bali. Sapatutnyane budaya saking duranegara punika kapilah-pilah sane becik lan nenten becik miwah sane encen sane mawiguna. Sane mangkin akeh kapanggih  truna-truni lan para jane sane lianan sane nenten urati ring budayannyane. Sapatutnyane dados truna-truni ngutsahayang ngelestariang adat, tradisi, seni miwah budaya lokal.

Malarapan antuk punika irage sareng sami sane wiakti dados krama Bali ngutsahayang  ngajegang Bali antuk budaya lan seninnyane. Utsaha ngajegang Bali puniki mangdane nenten  kalaksanayang olih adiri utawi pupulan para janene sane uning tekening budaya kemanten, nanging olih irage sareng sami sane dados krama Bali, utamannyane sane maagama Hindu, saantukan agama Hindu ring Bali nenten je prasida palas tekening kesenian lan budaya sane sampun rumaket ring soang-soang upacara yadnya ring Bali.

Ida dane sareng sami sane baktinin tityang.

Indik ngelestariang seni lan budaya sane kaanggen ngajegang Bali punika nenten je wantah uning lan prasida minekadi maigel-igelan kemanten nanging taler prasida antuk mabasa Bali, matata krama Bali lan tetep ngemargiang kekaryan adat keaagamaan agama Hindu sane lianan. Krane nike sane nyihnayang budaya Baline. Indik mabasa Bali punika, patut kalaksanayang seraina ring kulawarga soang-soang. Alit-alite mangda kaajahin nganggen basa Bali seraina ring kulawarga. Saantukan sane mangkin akeh kapanggih alit-alite nenten je nganggen basa Bali, utamannyane sane magenah ring kota, krane seraina kaajahin nganggen basa Indonesia ring kulawargannyane. Panadosnyane alit-alite merasa meweh ritatkala nganggen basa Bali. Malarapan antuk punika dahat penting pisan alit-alite kaajahin mabasa Bali ritatkala mapasuitran. Utsaha sane tiosan sane patut uratiang lan kalaksanayang ngajegang Bali, inggih punika sareng-sareng ngawiwitin antuk malajahin miwah ngelestariang kesenian lan budaya Bali minekadi sasolahan igel-igelan, madharmagita utawi makidung, malajah lan ngelestariang seni tetabuhan utawi gegambelan, malajah majejaitan, tetep ngamargiang tradisi lan budaya  ngarya ogoh-ogoh, miwah ngadakang sekancan acara-acara lomba sane prasida nincapang kawentenan budaya lan seni Baline. Tiosan punika minab kantun makeh utsaha-utsaha sane becik jagi anggen ngajegang Bali.

Inggih Bapak dosen lan Ida dane sareng sami sane wangiang tityang.

Wantah asapunika atur-atur tityang ring galah sane mangkin, tegesnyane  yening irage pacang ngajegang Bali puniki sepatutnyane irage sareng sami soang-soang  ngawiwitin antuk malajah lan ngelestariang seni miwah budaya Bali  ngawit saking mangkin mangda seni lan budaya Bali tetep ajeg lan lestari. Malarapan antuk punika ngiring mangkin irage sareng sami urati lan sareng-sareng malajah miwah ngelestariang seni lan budaya punika mangda prasida ngamolihang ajeg Bali. Inggih duaning wenten iwang ring napi sane aturang tityang iwau, ring galah puniki lugrayang tityang ngaturang geng rena sinampura. Inggih kaping untat sineb tityang antuk ngaturang Parama santi “Om santi, santi, santi Om”.